7 نصائح لازم تكون عارفهم قبل ما تشترى عقار
أشخاص كتير بتعمل فى السوق العقارى سواء مشترين او بائعين او شركات تسويق و غيرهم
فى الموضوع ده هنختص بالمشترين
و عشان فى أشخاص كتير بتندم بعد ما بتشترى عقار لأكثر من سبب
فا حبينا نقول مجموعة من النصائح اللى من خلالها تضمن انك تشترى عقار متندمش ابداً انك إشتريته
و النصائح دى كالتالى :
اول نصيحه :
لما تحب تشترى عقار لازم تحدد انت عايز تشترى عقار ليه ( للتجارة - ولا للإستثمار و لا للبيع ) او للسكن و هكذا ..
و بعد ما تحدد نوع العقار ..
حدد المكان اللى انت عايز تشترى فيه مثلاً المنطقة او الحى او غير كده من تفاصيل المكان
و بعد كده لازم تحدد إمكانياتك المادية و تقارنها بالأسعار الموجودة فى السوق.
فايدة خطوة التحديد دى : انك مش هتكون متشتت و كمان هتكون عارف البدائل الممكنة و القريبة من طلبك.
النصيحه التانية :
لو لقيت العقار اللى انت عايزه و بالسعر اللى انت عايزه معروض فى السوق يبقى اتوكل على الله مبروك عليك :)
و لو لقيت السعر أعلى من إمكانياتك اتصل بالجهة اللى عارضة العقار و حاول تتفاهم معاهم و تقولهم على إمكانياتك او أسألهم عن السعر لو فى مجال للتفاوض.
النصيحه الثالثة :
يكون كويس جداً لو كلفت وسيط واحد بتثق فيه انه يدورلك على العقار اللى انت عايزه او على الأكثر ممكن تكلف 2 وسطاء
عشان لو انت كلفت أكثر من 2 وسطاء هتلاقى البلد كلها بتدورلك على العقار اللى انت عايزه .. فا هتلاقى صاحب العقار اللى انت عايزه هيتحكم على كيفه و هيعرضه بسعر عالى و بيستغل الفرصة
عشان كده وسيط واحد أفضل.
النصيحه الرابعة :
لازم تستفسر عن كل التفاصيل الخاصة بالعقار اللى انت عايزه :
( مساحه - عمر العقار - تفاصيل داخلية و خارجية - المالك - مخططات - عقود - اوراق قانونية ) و كل ما يخص العقار.
النصيحه الخامسة :
لما تفكر تشترى بطريقة التمويل العقارى لازم تتأكد أنك قادر إنك تسدد عشان متدخلش فى مخاطرة كبيرة نهايتها مش هتبقى كويسة.
النصيحه السادسة :
بلاش تحسر نفسك فى نوع عقار مش متوفر او غالى و تحط فى بالك إنك هتشتريه لو بعد سنين
الأفضل إنك تشوف البدائل المتوفرة عندك مثلاً او أقرب شئ من العقار اللى انت عايزه.
يعنى إتنازل شوية مش لازم تحقق كل إحلامك :)
النصيحه السابعة :
خليك دايماً على إطلاع على المشاريع العقارية الجديدة و القديمة و تطوراتها و أسعارها ،
و لو معندكش إمكانية تطلع بشكل شخصى و تفهم اللى بيحصل ، إستعن بالأشخاص العقاريين بأكثر من مصدر و قارن بين الآراء و خد نتيجة من المقارنة اللى هتعملها.
و ممكن تشوف كمان المواضيع دى عشان تستفيد أكثر فى عملية شراء العقار :-
أهم الأوراق القانونية الخاصة بنقل الملكية لإتمام شراء عقار
ما هو التوثيق بالشهر العقارى و ما هى دعوى صحة توقيع و الإجراءات الصحيحة لتوثيق عقد الملكية
عشان تختار صح لازم تكون عارف ايه هى أنواع الوحدات فى الكمبوند بشكل عام
